ZAIDI YA MILIONI 24 TASLIMU ZAPATIKANA KATIKA HARAMBEE YA UJENZI WA JENGO LA UTAWALA LA SHULE YA SEKONDARI MWADUI

Jana katika KANISA LA KIINJILI LAKILUTHERI TANZANIA usharika wa Ebeneezer kanisa kuu Shinyanga kulifanyika harambee kwa ajili ya ujenzi wa jengo la utawala wa shule ya sekondari Mwadui inayomilikwa na KKKT dayosisi kusini mashariki ya ziwa Victoria, ambapo zaidi ya kiasi cha shilingi milioni 24 taslimu, nje na ahadi zilipatikana.

Akisoma risala mbele ya mgeni rasmi makamu mwenyekiti wa kamati ya maandalizi ya harambee hiyo ndugu Anderson Lyimo alisema “ Shule ya sekondari ya Mwadui ilianzishwa mnamo mwaka 1976 ikiwa chini ya mgodi wa WILLIAMSON DIAMONDS LTD na mwaka 1996 mgodi huu ulijitoa na shule hii ikawa chini ya KKKT usharika wa Mwadui.”

“Kwa sasa shule hiyo imekuwa ni moja ya shule zinazofanya vizuri katika ufaulishaji wa wanafunzi kwenda kidato cha tano. Pia shule hii imeanzisha masomo ya kidato cha tano na sita kwa michepuo ya PCM, PCB, CBG, HKL na HGK”

Akieleza baadhi ya changamoto nyingi zinazoikumba shule hiyo ni pamoja na ukosefu wa jengo la utawala hivyo kumuomba mgeni rasmi kusimamia harambee hiyo.

“Tunakamuomba mgeni rasmi uweze kuendesha harambee hii ili tuweze kupata fedha za kutosha kwa ajili ya kuanza ujenzi wa jengo la utawala wa shule yetu”

Akizungumza katika harambee hiyo mgeni rasmi ndugu ASA MWAIPOPO, amewapongeza sana wadau na watu wote waliojitokeza katika harambee hiyo kwani ni sehemu mojawapo ya kumtumikia Mungu.

“Hii kazi mliyokuja kuifanya, ni kwa ajili ya elimu ya watoto wetu kwa maisha yao ya baadae. Biblia inasema mkamate sana elimu usimuache aende zake, mshike maana yeye ni uzima wako”(mithali 4:13).

Naye askofu wa kanisa la kiinjili la kilutheri Tanzania, dayosisi kusini mashariki ya ziwa Victoria, Dr. Emmanuel Joseph Makala katika mahubiri yake aliwasihi wakristo kutokukataa wito walioitiwa.

“Wito wa Mungu kwa mwanadamu ulianzia katika bustani ya Edeni baada ya Adamu kutenda dhambi na akajificha, pamoja na dhambi alizotenda, bado Mungu alimuita naye akaitikia'' alisema askofu.

“Pamoja na kwamba dhambi inasononesha, inahuzunisha na kuaibisha bado Mungu hata leo anakuita.”

“Yawezakuwa wito akuitiao Mungu ni juu ya utoaji sadaka, hivyo utakapotoa sadaka yako, hilo litakuwa itikio la wito wa sauti ya Mungu, nayo sadaka yako itakuwa manukato mbele za Mungu na utabarikiwa zaidi”

Mgeni rasmi Ndugu Assa Mwaipopo mkurugenzi mtendaji wa kampuni ya ACACIA GOLD MINE akijibu risala iliyotolewa na makamu mwenyekiti wa kamati ya maandalizi ndg. Anderson Lyimo

Askofu Dr. Emmanuel Joseph Makala, Askofu wa KKKT - DAYOSISI KUSINI MASHARIKI YA ZIWA VICTORIA akitoa neno wakati wa ibada.

Mtunza hazina wa Usharika wa Ebeneezer Gladness Sikawa akisoma matangazo wakati wa ibada

MC wa harambee hiyo ndugu Albert Kasa toka Mwanza akitoa maelekezo juu ya harambee hiyo

Makamu mwenyeiti wa kamati ya maandalizi ya harembee ndugu Anderson Lyimo akisoma risala mbele ya mgeni rasmi

Mchungaji msaidizi wa Dean kanisa kuu Ebeneezer Shinyanga, Jackson Maganga (kulia) akiwa na Mkuu wa jimbo la Shinyanga mjini mchungaji Gacha, wote wawili wakifuatilia kwa makini hotuba ya mgeni rasmi

Mkuu wa shule ya Sekondari Mwadui, Mchungaji Yohana Nzelu (kushoto) akiwa na mmoja wa wajumbe wa kamati ya maandalizi ya harambee

Katibu mkuu wa Dayosisi Kusini Mashariki ya Ziwa Victoria mchungaji Daniel Mono (kulia), makamu mwenyekiti wa kamati ya maandalizi Anderson Lyimo (katikati) pamoja na ndg Albert Kasa wakiwa ibadani.